Die voëlsoort is vernoem na Horatio Benedict Alfred Moquin Tandon, die Franse wetenskaplike wat die Swarttobie meer as 160 jaar gelede die eerste keer aan die Kaap De Goede Hoop geidentifiseer en aangeteken het.

Die Swarttobie verskyn sedert die 1980’s op die Internasionale Lys van Bedreigde Spesies (Rooi Databoek) as ‘n naby-bedreigde spesie nadat hul getalle tot ‘n kommerwekkende geskatte   4 800 in totaal gedaal het  weens eiendomsontwikkeling en habitatbeskadiging.

Een van die groot bydraende faktore tot die afname in getalle was dat die Swarttobie hoofsaaklik in sand net bokant die hoogwatermerk broei, en voertuie op Suid-Afrikaanse en Namibiese strande hul neste en kuikens vernietig het.

Die voëls se getalle het sedertdien weer toegeneem tot meer as 6 000, onder meer  weens beskermingsmaatreëls soos die verbod van voertuie op strande, asook die besmetting van gedeeltes van die Suid-Afrikaanse kus met Mediterreense mossels. Dié indringerspesie maak tans ‘n belangrike deel van die Swarttobie se dieet uit waar dit voorkom, en het gelei tot ‘n skerp toename in die aanwas van die voëls daar. Dit het terselfdertyd ook gelei tot die herstel van die inheemse mosselbevolking waar dit deur die Mediterreense mossels verdring is.